1 Tawarikh 2
Iamote tu anakna muane Israel: Ruben, Simeon, Lewi na Yehuda, Isakhar, na Zebulon,
Dan, Yusuf na Benyamin, Naftali, Gad na Asyer.
Iatu anakna muane Yehuda iamotu: Er, Onan na Syela; iamotu tallu tau napadadianni anakna Syua, to Kanaan. Apa iatu Er, pa’bunga’na Yehuda, tae’ naalai penaanNa PUANG tu gau’na, iamoto Napatei.
Iatu Tamar, minintunna baine, umpadadianni Peres na Zerah. Iatu mintu’ anakna muane Yehuda limai.
Iatu anakna muane Peres iamotu: Hezron na Hamul.
Iatu anakna muane Zerah iamotu: Zimri, Etan, Heman, Kalkol na Dara, limai sola nasang.
Iatu anakna muane Karmi iamotu Ahar, tu untumang to Israel, belanna naala tu apa pepayu.
Iatu anakna muane Etan iamotu Azarya.
Na iatu pia muane tu dipadadian Hezron iamotu Yerahmeel, Ram na Khelubai.
Na Ram undadian Aminadab, na Aminadab undadian Nahason, arungna to Yehuda.
Nahason undadian Salma, na Salma undadian Boas.
Boas undadian Obed na Obed undadian Isai.
Isai undadian Eliab, pa’bunga’na, Abinadab, tu ma’penduanna, Simea, tu ma’pentallunna,
Netaneel, tu ma’penna’pa’na, Radai, tu ma’pellimanna,
Ozem, tu ma’pennannanna na Daud, tu ma’pempitunna.
Na iatu anak daranna tau iato mai iamotu Zeruya na Abigail. Iatu anakna muane Zeruya iamotu Abisai, Yoab na Asael, tallui sola nasang.
Abigail undadian Amasa, na iatu ambe’na Amasa iamotu Yeter, to Ismael.
Na iatu Azuba, bainena Kaleb, anakna Hezron, undadian Yeriot; na iatu anakna muane Yeriot, iamotu Yesyer, Sobab na Ardon.
Iatonna matemo tu Azuba umpobainemi Efrat tu Kaleb, anna padadianni Hur.
Hur undadian Uri, na Uri undadian Bezaleel.
Malemi tu Hezron umpellambi’i anakna Makhir, ambe’na Gilead, napobainei, tonna annanmo pulona taunna, anna padadianni tu Segub.
Segub undadian Yair; iate tau iate umparenta duangpulo ntallu kampong lan lili’na Gilead.
Apa iatu Gesur sola Aram unnala kampong. Mintu’ kampong iato iamotu Kenat sia mintu’ lili’na, annan pulona kampong. Mintu’ kampong iato nalili’ parentana Makhir, ambe’na Gilead.
Apa iatonna matemo tu Hezron dio Kaleb-Efrata, iatu Abia, bainena Hezron, umpadadiampi tu Asyhur, ambe’na Tekoa.
Iatu anakna muane Yerahmeel, pa’bunga’na Hezron, iamotu Ram, pa’bunga’na, nadampi’i Buna, Oren, Ozem na Ahia.
Apa iatu Yerahmeel kebaine polepa, disanga Atara, iamo indo’na Onam.
Iatu anakna muane Ram, pa’bunga’na Yerahmeel iamotu Maas, Yamin na Eker.
Iatu anakna muane Onam iamotu Samai na Yada, na iatu anakna muane Samai iamotu Nadab na Abisur.
Iatu bainena Abisur disanga Abihail tu umpadadianni Ahban na Molid.
Iatu anakna muane Nadab iamotu Seled na Apaim; iatu Seled matemo natae’ namembati’.
Iatu anakna muane Apaim iamotu Yisei; iatu anakna muane Yisei iamotu Sesan; iatu anakna muane Sesan iamotu Ahlai.
Iatu anakna muane Yada, siulu’na Samai iamotu Yeter na Yonatan; iatu Yeter matemo natae’ namembati’.
Iatu anakna muane Yonatan iamotu Pelet na Zaza. Iamote tu bati’na Yerahmeel.
Iatu Sesan tae’ anakna muane, sangadinna baine manna; iatu Sesan ma’kaunan misa’ to Mesir, disanga Yarha.
Napasituru’mi Sesan tu anakna baine napobaine Yarha, kaunanna, napadadianni tu Atai.
Na Atai undadian Natan, na Natan undadian Zabad.
Na Zabad undadian Eflal, na Eflal undadian Obed.
Na Obed undadian Yehu, na Yehu undadian Azarya.
Na Azarya undadian Heles, na Heles undadian Elasa.
Na Elasa undadian Sismai, na Sismai undadian Salum.
Na Salum undadian Yekamya, na Yekamya undadian Elisama.
Iatu anakna muane Kaleb, siulu’na Yerahmiel, iamotu Mesa, pa’bunga’na. Iamo ambe’na Zif, na bati’na Maresa, ambe’na Hebron.
Iatu anakna muane Hebron iamotu Korah, Tapuah, Rekem na Sema.
Sema undadian Raham, ambe’na Yorkeam, na Rekem undadian Samai.
Iatu anakna muane Samai iamotu Maon, na Maon ambe’na Bet-Zur.
Na Efa, gundi’na Kaleb, undadian Haran, Moza na Gazes; na Haran undadian Gazes.
Iatu anakna muane Yohdai iamotu Regem, Yotam, Gesan, Pelet, Efa na Saaf.
Iatu Maakha, gundi’na Kaleb, undadian Seber na Tirhana.
Sia undadian duka Saaf, ambe’na Madmana na Sewa, ambe’na Makhbena na ambe’na Gibea; na iatu anakna baine Kaleb iamotu Akhsa.
Iamote tu mintu’ anakna Kaleb. Iatu anakna muane Hur, pa’bunga’na Efrata, iamotu Sobal, ambe’na Kiryat-Yearim:
Salma, ambe’na Betlehem, na Haref, ambe’na Bet-Gader.
Iatu bati’na Sobal, ambe’na Kiryat-Yearim, iamotu Haroë na sangsesena Menuhot.
Iatu pa’rapuanna Kiryat-Yearim iamotu to Yetri, to Puti, to Sumati na to Misrai; lan mai pa’rapuan iate nanii bu’tu to Zora na to Estaol.
Iatu anakna Salma iamotu Betlehem, to Netofa, Atarot-Bet-Yoab, sangsesena to Manahti na to Zori.
Iatu pa’rapuanna to massura’ umpa’tondokki Yabes iamotu to Tirati, to Simati, to Sukhati; iamoto tu to Keni, bati’na Hamat, ambe’na rapu Rekhab.